[ندعوك للتسجيل في المنتدى أو التعريف بنفسك لمعاينة هذه الصورة]رسالة شهيد فى عيد الام
يعز عليا بكاكِ يا امي في يوم العيد
وانا ابنك ضناكِ .. بقيت مش معاكِ
سايبلك اساكِ ....... وحزنك شديد
وابويا اللى محني
و حاضن فى صورتي
يتمنى شوفتي .. و شارد بعيد
واخويا اللى قافل بيبانه وعنيه
مستني صوتي ينادي عليه
ورافض يصدق وحزنه مداريه
لأني وحيده اخويا الوحيد
صبايا وصباه .. وعمري معاه
وضحكي وبكاه .. شيلهم في قلبي
وجوه الوريد
و صورة لحبيبتي في جيبي الشمال
رويتها بدمعي ودمي اللي سال
سيبهم يا أمي و بسأل سؤال
بإيه دمعكم يغير أو يفيد
يعز عليا بكاكم يا أمي في يوم العيد
بصبر قلوبكم .. مسيري هاخدكم
ما أنا اصلي شايفكم
سبعين من حبايبي معايا اكيد
وبلادي بلادي..لامس ترابك
ونيلك وبحرك..وشمسك وضلك
وايه تانى اقولك
يا اغلى أم و احلى نشيد
شايفك و شايف زحمة شارعنا
و لعب العيال فى اول حارتنا
وصوت الادان من فوق بيوتنا
جيبلك معاه الفجر الجديد
ده دمي في ارضك شمعة تقيد
وموتي لأجلك كسر بيبان
و دوب حديد..
وغير وحرر آلاف العبيد
وجمع قلوب وإيد ويا إيد
ويصعب عليا فراقكم يا أمي في يوم العيد
في عيدك يا أمي بسلم عليكِ
وفارد اديا بتحضن اديكِ
وضحكة عنيا بتلمس عنيكي
ونجوم السما بتغزلك عناقيد
فوق جبينك يا أمي في يوم العيد
ويا ست الحبايب .. جايلك و جايب
اغلى هدية..في الجنة شايفك
تنادي عليا ... والكون ده كله عليكِ شوية
يا أم الشهيد
الإثنين مايو 23, 2011 8:30 pm
