شفت القلم يبكي على صفحة كتاب

شفت القلم يبكي على صفحـة كتـاب
جيت امسح دموعـه وفـا وكتبتنـي

بدا بقصّة غربتـي واسهـب اسهـاب
لين الحـروف اللـي كتَبهـا بِكَتنـي

الغربه اللي صـارت لحزنـي اسبـاب
وطّنتـهـا بالشـعـر واستوطنتـنـي

لين اصبَحَت حارس على كل الابـواب
حتّى وانـا فـي موطنـي ضايقتنـي

ماني بمستغـرب إذا الوقـت ماطـاب
مادامهـا غصـبٍ علـي رافقتـنـي

اشلون اباستغرب وانا همومي اسراب
لاحَلّـقـت فيـنـي ولافارقـتـنـي

ولانـي بمذهـولٍ ولانـي بمـرتـاب
حتّـى ولـو عـن واقعـي غَرّبَتنـي

صحيح من قال الزمـن شبـه دولاب
تغَـيّـر ايـامـه .. ولا غيّـرتـنـي

أمضي وانا في داخلي قلـب منصـاب
أضحَك لو ظروف الزمـن حاصَرَتنـي

آشوف كل الناس من حولـي احبـاب
حتّى لـو قلـوب البشـر غالطتنـي

تجي علـي ايـام ماعِـدّ الاصحـاب
وكثيـر مابعـض الوجيـه انكرتنـي

تغيب عنّا وجيـه .. ووجيـه تغتـاب
وياما..اكثر وجيـهٍ نِسَـت وذكرَتنـي

ياما..مَلَو جـوّي بتَصفيـق الإعجـاب
ويامـا عِبـارات الرّضـا داعَبَتـنـي

وياما..احتفت بي واغرقتني بالالقـاب
وانـا ادري إنّـي لامشيـت بهَتَتنـي

استانس وجيـه الأعـادي والاجنـاب
بالطّيبه اللي طـول عمـري سِبَتنـي

اوسّع الخاطر علـى بَعـض الاقـراب
اللي على بَعـض العـزوف اجبَرتنـي

لو خاب ظنّي قلت .. ما ..ظنّتي خـاب
يالنّيّـه الـلـي دايـمـاً لازمتـنـي

أصمت ولا آبيّـن مشاريـه وعتـاب
ليـه العتـاب وشيمتـي نزّهَتـنـي؟

قِل.. للحسافه تلبـس عتابـي ثيـاب
دام النوايـا الصّافيـه مـا انصفَتنـي

مهما الصخا.. بكفوف جود الزمن شاب
قناعتـي جـادت عليّ..واكرمتـنـي

ومهما الوفا كل اكثره بالبشـر غـاب
يَبقى عرينه بيـن مَتنـي .. ومَتنـي

كيف الزمن يصدق على لسان كـذّاب
وكيـف النوايـا الصّادقـه كَذّبتـنـي

الله أكبر .. وش بقى الوقـت ماجـاب
خلّـه يخفّـف مـن ذنـوب اثقَلَتنـي

استَصغـر الدنيـا ولا آكـون طَـلاّب
إلا لمـن هـو خِيـرِتـه سَيّرَتـنـي

الله لايجعـل علـى عيونـي حجـاب
عـن حاجـةٍ فـي طاعتـه قرّبَتنـي

ولا يجعل الدنيا لهـا عنـدي حسـاب
لو هي على كرهـي لهـا حاسبتنـي

هذي هي الغربـه وذا هـمّ الاغـراب
اللـي كثيـر النـاس عَنهـا سألتنـي

الغربه اللـي حارسـه كـل الابـواب
رحَلـت عنهـا وشَرّقـت ولحَقَتـنـي